LE CONTEXTE DE L'ÉPISTOLE
- La Charte de 1830 : texte constitutionnel qui fonde la monarchie de Juillet.
- Joseph le Bon (1765-1795) : Homme de la Terreur, il dirige en février 1794 le tribunal révolutionnaire qui siège à Arras puis à Cambrai jusqu'au 10 juillet.
1ère ÉPISTOLE (Partie 1)
L’ dissiète Féverrier 1836.
A ch’féseu d’Gazette au couin del plache à Kaimbré.
I a pus d’chonque s’moines que j’dégratte m’n’oreille pou bouter (1) aine saquoi (2) d’zu vo gazette. Sains tortiner (3) pus longtaimps, j’ vas vous défiler min capelet (4). Accoutème ain po, j’ vos l’ baillerai courte et
bonne.
Aine fos qu’ j’éto allé m’ faire rajonir hamon ch’ cousin l’ barbier, j’ ravise attiqué
(5) conter ch’ mur des belle’é-z-imaches ain
couleu. Drochi ch’éto aine pourtraiture d’ no ro chitoïen bouté d’zu ain qu’vau, ki vo défulo sain capiau (6). Et
i avo écrit ain lettes molées : EL’ CHARTE S’RA DÉSORMAIS AINE VÉRITÉ, d’zou les piés d’sain qu’vau. Drolà (7) i
éto habié ain fusier et i basio ain drapiau ki r’sanno à ch’ti kil éto aud’bout d’ no cloquet da taimps qu’Joseph l’Bon ki kopo des tiette’ à Kaimbré. Et i diso, ch’ro chitoien, ki rassaquo aveuc
orgueil chés glorieuss’é coleus kil avo toudi muché dains sain coeur et kil avo porté longtaimps. (J’m’apainse ain po ki volo dire du taims kain l’aplo général Égalité.) Et jem’diso inter mi-même
: i gni a mi grain ma à cha, des gouts et des couleus ain d’o point disputer. Mais v’là qu’j’avise attiqué à sain côté
ain bochu ki li feso aine grimasse, et kil avo, révérainche parlaint, s’maronne déblouquée, et ki feso conter ch’mur queque kose kain n’peut mi dire. Et ki diso ch’bochu, ain juraint comme ain
r’nie-Diu. T……. de D…………. Mahieu, dains queu position te v’là !
(1) Bouter : placer, mettre, poser. Ici,
écrire
(2) Eun' saquoi : quelque chose.
(3) Tortiner : tortiller.
(4) Défiler sin capelet : dire tout ce qu'on a sur le
cœur.
1ère ÉPISTOLE (Partie 2)
Ch’cousin, que j’dis à ch’barbier, douqu’ché qu’vos avez été querre ch’l’ordure d’imache-là ? Bah ! ki
m’ dit, ch’é ain moussieu ki roule tertous chés villaches, ain cachaint après d’zoches, pou li faire du chuque, kil l’a baillé à ch’tiau blond, pour aine live d’oches. Qu’main cha, que j’dis ;
éjou qu’vos volez qu’vo fieu kil apperne à jurer comme ain pove et à moutrer à ches passains tout chou kain n’dro point vire ?
Ch’é-ti point aindévaint pou no pove curé ki nos r’corde ain biaux chermons dains z’kaière à préchoir,
kain n’do mi jurer et ki fo être sache ; d’vire des cacheux d’oches v’nir moutrer à nos innochains d’z’ordures d’imaches dousqu’ain véo des postures qu’cha fait d’ma à sain coeur, et des
juremaints kain croro qu’cha sort del bouque du diable. Si leu fo d’zoches pou leu chuque, n’pourrotent-i-point l’z’acater ? Et si n’ont point aut’kose que d’z’imaches pou pâier,
n’pourrotent-i-point bailler tous purs Louis-Flippe ? Aincore ki-z-attrapent ché-z-ainfains. Car aine live d’oches cha vau ben toudi deux patares, et je n’ vodro mi bailler deux doubes d’leu
pourtraiture. J’ gagero qu’cha r’sanne à Louis-Flippe comme ain ka à ain kien. Ain li a fait d’zu ch’l’imache des tiaus yus et aine grosse painche. Et ain ro chitôien cha n’dro mi être painchu ni
berlou, hémon ?
Et à ch’t’heure que j’vos ai conté m’n’affaire, j’vos défule main capiau à main tour, et j’ai
l’honneur d’être chou kain boute au bas d’aine lette.
JÉROME PLEUMECOQ dit CH’FISSIAU.
